Instagram – гэта пра жаданне быць пачутым. І калі вы гатовы – свет гатовы пачуць вас!
Гэты курс для людзей, якім хочацца быць у сучасным свеце, але на сваіх умовах. Гэта для тых, хто стаміўся ад таго, што “трэба разабрацца з Instagram”, але ніхто нармальна не тлумачыць. Для тых, хто штосьці стварае рукамі або сэрцам: вяжа, вучыць, выпякае, дапамагае людзям і хоча, каб пра гэта даведаліся.
Гэты курс таксама для вас, калі вы проста хочаце весці сваю старонку дзеля радасці, зносін, захавання ўспамінаў. Каб сябры, дзеці, унукі, новыя людзі бачылі вас, чыталі, падтрымлівалі. Каб вы самі глядзелі на свой профіль і думалі: «О, гэта я. І гэта класна».
Вы пазнаёміцеся з усім, што патрэбна, каб Instagram працаваў на вас. Даведаецеся, як аформіць акаўнт так, каб ён выглядаў прывабна і прафесійна, нават калі вы пачатковец. Я раскажу, як працуе алгарытм Instagram, чаму адны пасты бачаць, а іншыя не, і што з гэтым рабіць.
Вы зразумееце, чым асабісты акаўнт адрозніваецца ад бізнес-старонкі, і калі варта на яе пераходзіць. Даведаецеся, як пісаць тэксты так, каб чыталі і чакалі наступны пост. Вы навучыцеся здымаць простыя відэа і сторыс, весці прамыя эфіры, запускаць рэкламу на сваю старонку або асобныя публікацыі, калі захочаце прасунуць сваю справу ці ідэю шырэй.
І галоўнае – вы адкрыеце для сябе Instagram як месца, дзе можна быць сабой, без масак, стрэсу і «правільнасці».
Унікальнасцю курса з’яўляецца тое, што ён створаны спецыяльна для людзей 50+: без спешкі, без тэхналагічнага ціску, з павагай да вашага тэмпу і вопыту. Васіль Ядчанка, які вядзе гэты курс, мае шматгадовы досвед выкладання менавіта для гэтай аўдыторыі, таму разумее вашыя патрэбы, страхі і сілу.
Кожны занятак – гэта жывое навучанне з падтрымкай, гумарам і практыкай тут і цяпер: вы адразу робіце тое, пра што гаворым. А яшчэ – гэта курс, дзе можна задаваць пытанні без сораму, памыляцца без крытыкі і адчуваць сябе ўпэўнена, нават калі вы ніколі не вялі сацыяльныя сеткі.
Для заняткаў нам спатрэбіцца перш за ўсё – смартфон. Пераканайцеся, што ён цалкам зараджаны перад кожным заняткам, а таксама бярыце з сабой зарадную прыладу (кабель і/або павэрбанк) на ўсялякі выпадак.
Калі ласка, ачысціце памяць на тэлефоне: вам спатрэбіцца месца для фота і відэа, якія мы будзем здымаць падчас заняткаў.
Таксама вельмі важна, каб вы умелі ўключаць камеру, рабіць фота і здымаць відэа на сваім смартфоне. Наш курс – не пра тое, як карыстацца тэлефонам, а пра тое, як весці Instagram. Таму калі вы не ўпэўненыя, як уключаецца камера ці дзе захоўваюцца здымкі, папрасіце сяброў ці дзяцей/унукаў паказаць загадзя.
Перыядычнасць заняткаў:
Раз на тыдзень па аўторках. Пачынаем 26 студзеня ў 12.00.
Увага! Час і месца правядзення заняткаў могуць карэктавацца.
Курс вядзе Васіль Ядчанка – выкладчык з больш як 20-гадовым досведам у медыя, PR і адукацыі. Ён працуе з дарослай аўдыторыяй, у тым ліку з людзьмі 50+, дапамагаючы ім засвойваць сучасныя інструменты камунікацыі з павагай і цярпеннем.
Васіль – блогер, чые відэа і пасты штомесяц ахопліваюць мільёны унікальных карыстальнікаў. Ён кансультуе СМІ, НДА і прыватных асобаў па вядзенні Instagram і стратэгіях анлайн-прасоўвання.
Апроч таго, Васіль – чалавек з пачуццём гумару, які ведае, што вучоба павінна быць не толькі карыснай, але і душэўнай. Ён умее тлумачыць складанае проста, падтрымліваць нават самых асцярожных удзельнікаў і дапамагаць кожнаму знайсці свой голас у Instagram.