УЗВ-Уроцлаў: сустрэнемся увосень!
Студэнты, выкладчыкі, арганізатары і госці сабраліся 25 красавіка на выпускную сустрэчу Беларускага Універсітэту Залатога Веку ва Уроцлаве, прысвечаную сканчэнню заняткаў першага семестру УЗВ.
– Сімвалічна, што нашая сустрэча праходзіць сёння ва Уроцлаве – горадзе, з якога пачыналася гісторыя беларускіх Універсітэтаў Залатога Веку. Менавіта са знаёмства з працай Універсітэту трэцяга веку пры Уроцлаўскім універсітэце пачалося стварэнне першага беларускага УЗВ у Гродне. Мы не раз ездзілі адзін да аднаго ў госці, абменьваліся досведам. А сёння – адзначаем тут завяршэнне першага сезону Беларускага УЗВ у Польшчы.
З такіх словаў распачала сваю вітальную прамову кіраўніца праграмы УЗВ, старшыня праўлення Міжнароднага фонда развіцця адукацыі дарослых Лана Руднік.
Беларускі УЗВ ва Уроцлаве ў лічбах:
- 6 курсаў
- 38 заняткаў
- 19 агульных сустрэч
- 16 выкладчыкаў
- 54 студэнты
Заняткі ва Уроцлаве праходзілі ў будынку Dolnośląska Biblioteka Publiczna im. Tadeusza Mikulskiego, якая з’яўляецца партнёрам УЗВ у гэтым горадзе. Тут жа праходзіла і выпускная сустрэча.
Удзельнікі сустрэчы мелі магчымасць прыгадаць яркія моманты першага сезону, выказаць словы падзякі арганізатарам і выкладчыкам, якія атрымалі таксама сімбалічныя падарункі ад кіраўніцтва УЗВ.
Разынкай сустрэчы стала таксама святочная латэрэя, пераможцы якой атрымалі цудоўныя падарункі ад бібліятэкі.
Ну а пасля афіцыйнай часткі ўсіх чакаў святочны торт і канцэрт.
Вось якімі ўражаннямі студэнты з Уроцлава падзяліліся ў падсумаваўчай анкеце:
Усе курсы праводзіліся найвышэйшым узровень, супер!!! Унікальнасць УЗВ у тым, што тут аўдыторыя майго узросту, цёплая атмасфера, высокі прафесійны узровень заняткаў і добры падбор валантораў- выкладчыкаў курсаў.
Вольга
Вельмі прыемная атмасфера, цудоўная арганізацыя, цікавая навучальная праграма.
Марына
Гэты праект дае людзям магчымасць зберагчы свае здароўе, быць актыўнымі, праяўляць ініцыятыву і актыўную пазіцыю да жыцця на працягу доўгага часу, мець свае асабістае жыццё асобна ад блізкіх, что робіць чалавека з узростам цікавым і энергічным.
Ірына
Уникальность «Университета Золотого Века» в том, что он создаёт пространство для обучения и активной жизни людей 50+. Здесь можно не только получать новые знания, но и общаться, чувствовать поддержку, оставаться включённым в общество и сохранять интерес к развитию и новым впечатлениям.
Женя
Цяпер студэнты УЗВ ва Уроцлаве пайшлі на канікулы, каб вярнуцца да заняткаў увосень.
